Boligsalgsrapporten

Boligsalgsrapporten er din beste garanti for problemfri eigedomshandel!

Boligsalgsrapporten er i prinsippet ein Tilstandsrapport, men legg i tillegg ekstra stor vekt på å framstilla dei byggetekniske tilhøva som er relevante ved eit eigarskifte.  Boligsalgsrapporten er slik særleg tilpassa Avhendingslova.

Boligsalgsrapporten er eit felles rapportformat for takstbransjen og er utvikla i samarbeid med Forbrukarrådet. Også eigedomsmeklarorganisasjonane ynskjer at denne rapporten blir nytta ved eigarskifte.

 

Føremålet med Boligsalgsrapporten er å gje både seljar og kjøpar eit verktøy som skapar best mogleg tryggleik ved eigarskifte.

 

NITO Takst og Norges TakseringsForbund tilrår sine medlemer å nytta Boligsalgsrapporten som einaste rapportformat ved tilstandsrapport i samband med eigarskifte.

Kortversjon / brosjyre - klikk her

Bustadkjøp er for dei fleste av oss den største investeringa vi gjer og ingen av oss ynskjer å kjøpa "katta i sekken". Ein grundig Boligsalgsrapport vil gje aktuelle kjøparar større tryggleik og kan slik gje seljar høgare pris i ein bodrunde.

 

Ved Boligsalgsrapporten skal eigar fylle ut Eigenerklæring. Dette er eit standardisert skjema som er enkelt å fylla ut og også er ei grei "hugseliste" for seljar. Dette er også identisk med skjema som meklarane nyttar ved teikning av Eigarskifteforsikring.

 

Litt meir om rapporten....

 

Boligsalgsrapporten er meint å vera eit verktøy som skal medverka til auka tryggleik for dei involverte partane, utan at rapporten skal erstatta verken seljar si opplysingsplikt eller kjøpar si undersøkingsplikt.

Boligsalgsrapporten er ein systematisk presentasjon av dei tilhøva som takstingeniøren har observert ved sin gjennomgang av takstobjektet og den tek dessutan særleg sikte på å beskriva dei tilhøva som, etter takstingeniøren sitt skjønn, er vesentlege ved eit eigarskifte.
Boligsalgsrapporten gjev, som andre tilsvarande rapportar, ingen garanti mot skjulte feil, skadar og manglar etter som takstingeniøren ikkje skal føreta opning av konstruksjonar.

Boligsalgsrapporten har levetidsvurderingar, der ein opplyser om kva generell levetid dei einskilde bygningsdelane har. Dette for å synleggjera for forbrukar at alle bygningsdelar har ei forventa levetid, som igjen fører med seg at alle bygg må ha regelmessig vedlikehald.

Normal levetid kan angje eit intervall mellom høg og låg forventa teknisk levetid, avhengig av kva faktorar som er tilstades, slik som regn, vind, sol, frost, forureining og bruk. Levetida kan variera noko dersom andre kriterium enn teknisk levetid er lagt til grunn, eksempelvis estetikk, økonomi, sikkerheit, funksjon eller brukarynskje. Levetidsvurdering er såleis av generell karakter og angjev gjennomsnittleg normal levetid.

Rapporten sin struktur

Rapporten sin struktur, metodikk og terminologi er, så langt det er teneleg i Boligsalgsrapporten, utført i samsvar med (Norsk Standard) NS 3424 (tilstandsrapport) og NS 3940 (arealmåling).

Materialbeskrivingar og beskrivingar av symptom på tilstandssvekking er i tråd med NBI si rettleiing for NS 3424 og tilhøyrande definisjonar og terminologi. 

Byggtekniske tilstandssvekkingar blir også gjeve etter denne standarden på fylgjande måte:

Tilstandsgrad 0: Ingen symptom

Tilstandsgrad 1: Svake symptom

Tilstandsgrad 2: Middels kraftige symptom

Tilstandsgrad 3: Kraftige symptom (også samanbrot og total funksjonssvikt)